13 декабрь көнне Киров шәhәрендә Киров өлкәсе татарларының милли –мәдәни автономиясе рәисе Я.Х.Асхатдинова Россия Федерациясенең Приволжск федераль округы буенча президентның тулы вәкаләтле аппаратының Киров өлкәсе буенча төп федераль инспектор Юсупов Ф.И. белән очрашты. Очрашуның максаты: туган тел, өлкә татарларының  тарихы hәм мәдәнияте кебек милли кыйммәтләрне саклап калу юлларын табу, милләтнең киләчәк алгарышы өчен юнәлеш билгеләү. Язилә ханым иң элек оешманың күп кырлы эшчәнлеге белән таныштырды. Фирдүс әфәнде ирешелгән уңышларга уңай бәя бирде hәм оешманың эшчәнлеге масса күләм чараларда аз яктыртылуына басым ясады. Икеяклы сөйләшү барышында телне өйрәнү, дини оешмалар белән эшләү, милли традицияләрдә яшь буынны тәрбияләү, уңышлы проектларны гамәлгә ашыру буенча конкрет чаралар билгеләнде.